كلاكيت للمرة المليون
ارحمونا بقى!كل يومين مختل عقليا هاجم كنيسة، مختل عقليا قتل عشرة في الصعيد ومثل بجثثهم! هما المختلين العقليين في مصر عاقلين للدرجة دي؟ ايه خلاص عارفين يخططوا ويفكروا وينفذوا بالحرفية دي؟ يا سلام يا ولاد، أما دول مختلين عباقرة بصحيح!
طيب لما هما ولا مؤاخذة بالذكاء ده كله، ليه ما يعملوش حزب للمختلين عقليا ويترشحوا لمجلس الشعب والنقابات؟ مش برضه باين عليهم هيبقوا أحسن وأذكى من الإخوان؟ صحيح هما باين عليهم كده هيركزوا على دبح الأقباط، إنما على الأقل هيبقى اللعب على المكشوف، مش اضطهاد وقتل في المسيحيين على المتغطي زي ما الإخوان والحزب اللاوطني اللاديمقراطي بيعملوا. وساعتها بقى هنعرف نجيب لجان تقصي حقائق وناخد حقنا تالت ومتلت!
ازاي بس أنا مش قادر أفهم أن واحد محترم وعنده ذريرة (مش حتى ذرة) من الذكاء يصدق أن المختلين العقليين يعني المتخلفين عقليا بالبلدي كده كل همهم أصبح قتل ودبح المسيحيين؟! يعني أنا أفهم أن المتخلف عقليا ده ممكن يكون بيريل على نفسه، فاكر نفسه مثلا شارلي شابلن وعمال يرقص في الشارع، مثلا عنده شعرة ساعة تروح وساعة تيجي، حاجات كده، إنما ماتحاوليش يا حكومة تقنعيني أن واحد متخلف يفكر ويتكتك وينفذ عمل إرهابي! يبقى فين بالظبط وجه التخلف هنا؟
عموما أرجع وأقول أن السبب الأول والأخير هو القضاء المصري السافل اللي بيحامي ويدافع عن كل إرهابي مجرم بيقتل المسيحيين، وقال ايه معلش هوا قتلله كام واحد ايه يعني أصله مختل عقليا وغير مسؤول عن تصرفاته. خلاص بقت رخصة للهروب من العقاب! والدليل الحكم الأخير اللي ناله المجرم الحقير اللي قتل عم صبحي في اسكندريه. لو مسمعتوش سعادة الباشا أخد حكم بالبراءة عشان مختل عقليا! نفسي أعرف مين القاضي الحيوان اللي حكم بكده وازاي لسه سايبينه في منصبه وازاي هو نفسه بيعرف ينام بالليل وهو ايديه ملوثة بدم واحد برئ؟ لو فيه أحكام عادلة ورادعة بحق الناس ديه ماكانش الموضوع انتشر للدرجة المستفزة ديه. عمركم سمعتم عن واحد مسلم أخد إعدام عشان قتل واحد مسيحي؟ دا قتلة الكشح بجلالة قدرهم اللي دبحوا 21 قبطي بدم بارد منهم عيال عندهم أربع سنين أكتر واحد فيهم أخد أربع سنين سجن عشان حيازة سلاح بدون ترخيص.
فعلا قضاء قذر قذر قذر! ده إذا كان فيه قضاء من أساسه في مصر، لأني أعتقد أن القضاء المصري أصبح قضاء وقدر!
posted by LANTERNIX @ 19:49
3 Comments:
أعتقد أن القضاء المصري أصبح قضاءوقدر!
I suppose the saying : "hamm yebakky w hamm yeda7ak" is apt in the circumstances.
لا حول الله يا رب، البلد دى ماعدتش لينا خلاص، لا حياة لمن تنادى البقية فى حياتنا يا بنى ...
The death of juctice.
Post a Comment
<< Home